10:09 PM
ponny
ആദ്യമേ തന്നെ ഞാന്‍ ഒരു കാര്യം പറയട്ടെ,ഞാന്‍ ഒരു തരക്കേടില്ലാത്ത വായാടിയാണ്.സദാസമയവും ഞാന്‍ ഇങ്ങനെ ചെലച്ചോണ്ടേ ഇരിക്കും.പ്രത്യേകിച്ച് അടുപ്പമുള്ളവരോട്.അപ്പോപ്പിന്നെ എന്റെ കെട്ടിയവന്റെ കാര്യം പറയണ്ടല്ലോ.മിക്കവാറും നിസ്സാരകാര്യങ്ങള്‍ പറഞ്ഞു ഞങ്ങള്‍ തമ്മില്‍ വഴക്ക് കൂടാറുണ്ട്.ഞങ്ങള്‍ എന്ന് പറയാന്‍ പറ്റില്ല..ഞാന്‍ വഴക്കുണ്ടാക്കാറുണ്ട് എന്ന് പറയുന്നതാണ് ശരി.അല്ല;എന്നെ കുറ്റം പറഞ്ഞിട്ടും കാര്യമില്ല.ഇന്നത്തെ ദിവസം വഴക്ക് കൂടണ്ട എന്ന് തീരുമാനിച്ചു മാതൃകാ ഭാര്യയായി മിണ്ടാതിരിക്കുന്ന എന്നോട് പൊന്നപ്പന്‍ ചേട്ടന്‍ ചോദിക്കും;''എന്ത് പറ്റിയെടീ?,നിന്റെ നാവ് ഇറങ്ങി പോയോ??.എന്തെങ്കിലുമൊക്കെ പറഞ്ഞോണ്ടിരിക്ക്.വന്ന് വന്ന് ഇപ്പൊ നിന്റെ ചിലപ്പ്‌ കേട്ടില്ലെങ്കില്‍ രാത്രി ഒറക്കം ശരിയാവുന്നില്ല..'' അല്ല..അപ്പൊ നിങ്ങള്‍ തന്നെ പറയ്‌, ഞാന്‍ ഇങ്ങനെ ആയി പോയത് എന്റെ കുറ്റം കൊണ്ടാണോ?!?..
ഇങ്ങനെ പോകുന്ന വഴക്കില്‍ ഇടയ്ക്ക് എനിക്ക് ഇഷ്ടപ്പെടാത്ത കാര്യം പറയുമ്പോള്‍ ഞാന്‍ പൊന്നപ്പന്‍ ചേട്ടനോട് ചോദിക്കും,'കുനിച്ചുനിര്‍ത്തി ഇടി വേണോ?' എന്ന്.ആദ്യമൊക്കെ അത് കേട്ട് ചിരിക്കുന്ന പൊന്നപ്പന്‍ ചേട്ടനെ കാണുമ്പോള്‍ എനിക്കും ചിരി വരുമായിരുന്നു.പിന്നെപ്പിന്നെ അതില്‍ തമാശയില്ലാതെയായി.അപ്പോഴാണ്‌ ടിവിയില്‍ 'കഥയല്ലിതു ജീവിതം' പ്രോഗ്രാം ഹിറ്റ്‌ ആകുന്നത്‌.അത് കണ്ടു പിന്നെ വഴക്ക് കൂടുമ്പോഴോക്കെ ഞാന്‍ പറഞ്ഞു തുടങ്ങി;''ഇത്തിരി ബഹുമാനത്തിലൊക്കെ നിന്നോ!!കൂടുതല് ഡയലോഗ് അടിക്കാന്‍ വന്നാല്‍ 'കഥയല്ലിതു ജീവിതത്തില്‍ ' ഒരാഴ്ച്ച എപ്പിസോടാക്കി ഇരുത്തും ഞാന്‍!!.'' അങ്ങനെ വീണ്ടും ഞങ്ങള്‍ ചിരിക്കാന്‍ തുടങ്ങി..
ആയിടയ്ക്കാണ് ഞാന്‍ ബ്ലോഗറായത്.അതിനുശേഷം എനിക്ക് കുറച്ചു അഹങ്കാരം കൂടിയിട്ടുണ്ടോന്നൊരു സംശയം!.അല്ല,പണ്ടേ അഹങ്കാരത്തിനു കുറവൊന്നുമില്ല..എന്നാലും സ്വന്തമായി ഒരു ബ്ലോഗ്ഗോക്കെ തുടങ്ങി,അതില്‍ ഒന്ന്-രണ്ടു കിറുമാണി പോസ്റ്റൊക്കെ ഇട്ടപ്പോള്‍ തലയ്ക്ക് കുറച്ചു ഭാരം കുടിയ പോലെ. പോരെ പൂരം!!പിന്നെ തൊട്ടതിനും പിടിച്ചതിനുമൊക്കെ ഞാന്‍ ചേട്ടനോടലറാന്‍ തുടങ്ങി,''എന്നോട് കളിക്കുന്നത് സൂക്ഷിച്ചു വേണം,ബ്ലോഗിക്കളയും ഞാന്‍!!''
ഒരിക്കല്‍ എന്റെ ചെലപ്പ്കേട്ട് പൊന്നപ്പന്‍ ചേട്ടന്‍ തലയില്‍ കൈവച്ചോണ്ട് പറഞ്ഞു;''എന്റീശ്വരാ..കയ്യിലെ കാശ് കൊടുത്ത് കടിക്കുന്ന പട്ടിയെ വേടിച്ചെന്നു പറഞ്ഞാല്‍ മതിയല്ലോ..!''.എനിക്ക് മനസ്സിലായില്ല..'കടിക്കുന്ന പട്ടി' എന്നെയാണ് ഉദ്ദേശിച്ചതെന്നു മനസ്സിലായി.പക്ഷെ കാശ് എപ്പോ കൊടുത്തു?എന്റെ അച്ഛനു കൊടുത്തോ!!?ഞാന്‍ ചേട്ടനോട് പറഞ്ഞു;''ഓഹോ..അപ്പൊ നിങ്ങടെ വീട്ടുജോലി ചെയ്യാന്‍ എന്നെ എന്റെ അച്ഛന്റെ കയ്യീന്ന് കാശ് കൊടുത്തു വേടിച്ചതാണല്ലേ!??.'' അപ്പൊ ചേട്ടന്‍ സഹികെട്ട്,''എടീ,പട്ടിക്കുട്ടീ,കാശ് കൊടുക്കാതെ നിന്നെ കെട്ടിവലിച്ചോണ്ട് വരാനുള്ള താലി പിന്നെ നിന്റെ അമ്മായിഅപ്പന്‍ തരുവോടി??.'' ഓ..അങ്ങനെ!! ''അമ്മായിഅപ്പന്‍ തന്നാലും ഇല്ലെങ്കിലും എനിക്ക് വീട്ടുജോലിക്ക് സഹായിക്കാന്‍ ആരെങ്കിലും വേണം.എന്നെക്കൊണ്ട് പറ്റില്ല എല്ലാം കൂടി ഒറ്റയ്ക്ക് കിടന്നു ചെയ്യാന്‍.''കിട്ടിയ അവസരം ഞാന്‍ മുതലാക്കി.പിന്നെ അത് പറഞ്ഞായി വഴക്ക്.അവസാനം ചേട്ടന്‍ പറഞ്ഞു,''ഓ,ഇനി അതിന്റെ കുറവ് കൂടിയേ ഉണ്ടായിരുന്നുള്ളൂ.ജോലിക്കാരെയൊക്കെ കിട്ടാന്‍ ഇപ്പൊ വല്ല്യ പാടാ..ആ..ഞാന്‍ നോക്കട്ടെ''എന്ന്.
അങ്ങനെയിരിക്കെ ഒരു ദിവസം രാവിലെ ഞാന്‍ നോക്കിയപ്പോള്‍ പൊന്നപ്പന്‍ ചേട്ടന്‍ ഒരു അമ്മൂമ്മയെ വീട്ടുജോലിക്ക് സഹായിക്കാനായി എവിടുന്നോ തപ്പിക്കൊണ്ടു വന്ന് നിര്‍ത്തിയേക്കുന്നു.കുഴിയിലോട്ടു കാലുംനീട്ടിയിരിക്കുന്ന അവരെക്കൊണ്ട് എങ്ങനെ ജോലി ചെയ്യിപ്പിക്കും എന്ന് സംശയിച്ചുനിന്ന എന്നോട് അവര്‍ ഭയങ്കര സ്നേഹത്തോടെ ഇനി മുതല്‍ എല്ലാക്കാര്യങ്ങളും അവര്‍ ചെയ്തോളാം എന്നും പറഞ്ഞു,തൂക്കാനുള്ള ചൂലും കൊണ്ട് രണ്ടാമത്തെ നിലയിലോട്ടുള്ള സ്റ്റെപ് കയറാന്‍ തുടങ്ങി..എന്റെ കര്‍ത്താവേ!!!പത്ത്-പതിനഞ്ചു മിനിറ്റ് കൊണ്ടാണ് അവര്‍ ഒരു സ്റ്റെപ് കയറുന്നത്,പിന്നെ ഒരു അര മണിക്കൂര്‍ ആ സ്റ്റെപ്പില്‍ തന്നെ ഇരുന്നു അതിന്റെ ക്ഷീണം തീര്‍ക്കും.പിന്നെ അടുത്ത സ്റ്റെപ്പിലോട്ടു! ഞാന്‍ മനസ്സില്‍ കണക്കുകൂട്ടി ;ഇങ്ങനെ പോയാല്‍ രാത്രിയാകുമ്പോഴേക്കും അങ്ങ് രണ്ടാമത്തെ നിലയിലെത്തും,എന്നിട്ട് പകല് മുഴുവന്‍ സ്റ്റെപ് കയറിയതിന്റെ ക്ഷീണം തീര്‍ക്കാന്‍ രാത്രി അവിടെ കിടന്നുറങ്ങിയിട്ടു രാവിലെ എഴുന്നേറ്റു തൂക്കാന്‍ തുടങ്ങുമായിരിക്കും..പിന്നെ ഇത് മലയിറക്കവും കഴിഞ്ഞു ഭൂമിയിലെത്തണമെങ്കില്‍ കുറഞ്ഞത്‌ ഒരാഴ്ച്ചയെങ്കിലും പിടിക്കും!!ഇത് ശരിയാവൂലാ..ഞാന്‍ മുറിയില്‍ പോയി പൊന്നപ്പന്‍ ചേട്ടനോട് ദേഷ്യത്തില്‍ ചോദിച്ചു,''എങ്ങനെ ഇത്രേം ഒത്തു കിട്ടി?നേരെ ചൊവ്വേ നടക്കാന്‍ പോലും വയ്യാത്ത ഇവരെ കൊണ്ട് ഞാന്‍ എന്ത് ജോലി ചെയ്യിപ്പിക്കാനാ?!.''അപ്പോള്‍ ചേട്ടന്‍,''ശോ!!പതുക്കെപ്പറ!ഇതുതന്നെ ഒപ്പിച്ച പാട് എനിക്കറിയാം.അവരെത്തന്നെ കൊത്തിക്കൊണ്ടുപോകാന്‍ ആള്‍ക്കാരുണ്ടിവിടെ!!.''ഞാന്‍ ചിറികോട്ടി പറഞ്ഞു,''അശ്ശോ!!അവരെ കൊത്തിക്കൊണ്ടു വരാന്‍ ചേട്ടന്‍ കൊറേ പാടുപെട്ടു കാണുമല്ലോ!!എന്തിനാ കൂടുതല് പറയുന്നേ?എനിക്ക് പണി കിട്ടീന്നു പറഞ്ഞാല്‍ മതിയല്ലോ!!.''
രണ്ട്-മൂന്ന് ദിവസം കഴിഞ്ഞപ്പോള്‍ തന്നെ എനിക്ക് ഒരു കാര്യം മനസ്സിലായി;അമ്മൂമ്മ ഞാന്‍ വിചാരിച്ച പോലല്ല;അതിനേക്കാള്‍ കടുപ്പമാണ്!!ജോലി ചെയ്യാനുള്ള മടിയും,കാശിനോടുള്ള ആക്രാന്തവും,അതും പോരാഞ്ഞു ഭയങ്കര നാക്കും!!ഒരു ദിവസം ഞാന്‍ അവരോടു ചോദിച്ചു,''വയസ്സായത് കൊണ്ട് നടക്കാനൊക്കെ ബുദ്ധിമുട്ടാ അല്ലേ?.'' അത് കേട്ടതും അമ്മൂമ്മയുടെ ഭാവം മാറി!,''ആര് വയസ്സായെന്ന്?!?എനിക്കധികം പ്രായമൊന്നുമില്ല.നിന്റെ ഒക്കെ പ്രായത്തില്‍ എന്നെ ഒന്ന് കാണേണ്ടത് തന്നെയായിരുന്നു.നിന്നെപ്പോലോന്നും അല്ല.ഒരു സുന്ദരിയായിരുന്നു ഞാന്‍!!.ഈ ജീവിതകഷ്ടപ്പാടൊക്കെ കാരണം ഇപ്പൊ വയസ്സ് കൂടുതല് തോന്നിക്കുന്നതാ.."ഭൂലോക സുന്ദരിയാണെന്ന് വിചാരിച്ചിരുന്ന എനിക്ക് അത് അത്ര പിടിച്ചില്ല.അത് മാത്രമല്ല;പലതും പിടിച്ചില്ല.തൂക്കാനാണെന്നും പറഞ്ഞു മുകളിലെ ഞങ്ങളുടെ ബെഡ്രൂമില്‍ പോയി കിടന്നുള്ള ഉറക്കം;ഞാന്‍ വച്ചുണ്ടാക്കി കൊടുക്കുന്നതിനൊന്നും സ്വാദില്ലെന്നും തികയുന്നില്ലെന്നുമുള്ള കുറ്റപ്പെടുത്തല്‍ ;അവരെ കുറിച്ചുള്ള അയല്‍ക്കാരുടെ പരാതി;ടിവിയിലെ പുരാണ സീരിയലുകളോടുള്ള അമിതമായ ആവേശം;;ഇതൊക്കെ അവരുടെ ലീലാവിലാസങ്ങളില്‍ ചിലത് മാത്രം!!എനിക്ക് മടുത്തു!.സഹിക്കവയ്യാതായപ്പോള്‍ ഞങ്ങള്‍ തീരുമാനിച്ചു,ഒരാഴ്ച്ച കൂടി കഴിഞ്ഞിട്ട് പറഞ്ഞു വിടാം..ഇതെങ്ങനെയോ മണത്തറിഞ്ഞ അമ്മൂമ്മയുടെ നാക്ക് ഒന്നുകൂടി ഉഷാറായി..
